Komunikado di Bestür

Komunikado di Bestür

Den transkurso di e simannan di 29 di yüni pa 9 di yüli último empleadonan di ACU i nan sindikato a tene algun akshon eksigiendo pa nan petishon riba algun punto wòrdu aseptá dor di Bestür i Gerensha di ACU.

Dunando entrevista na media dia 1 di yüli 2020 un representante di e sindikato di empleadonan di ACU a menshoná nòmber di sra. Nathalie van Sprang, ku ta e Sales & Service Manager di ACU.

Den e entrevista na televishon Direct inkorektamente a menshoná ku sra. Van Sprang ta HR Manager di ACU.

Ademas, loke ta kontrali na tur bèrdat, a menshoná ku sra. Van Sprang lo a yama empleadonan di ACU bobo i lo a rebahá i intimidá e personal di ACU.

Bestür di ACU ta ninga redondamente e akusashonnan hasí kontra nos kolega Nathalie van Sprang.

Sra. Van Sprang ta un kolega ku awor tin algu mas di 1 aña trahando na ACU i ku a bini ku su eksperiensia amplio den e mundu finansiero, bin reforsá e tim di ACU. Tur empleado di ACU konosé komo un persona dediká, responsabel i ku rèspèt pa tur hende, sin importá nan funshon den e organisashon di ACU.

Bestür di ACU ta lamentá inmensamente e ekspreshonnan hasí riba dia 1 di yüli último i ta haña nesesario pa públikamente sali na defensa di nos kolega Van Sprang.

Apesar ku Bestür di ACU ta respetá e derecho di empleadonan pa wèlga, esaki no por bai kompañá ku akusashonnan infundá kontra  un funshonario di ACU.

Sra. Van Sprang komo Sales & Services Manager, huntu ku su tim na e filialnan na Otrobanda i Scharloo, lo sigui traha inkansablemente pa duna e sosionan di ACU e mihó servisio posibel.

Atentamente,

Na nomber di Bestür di ACU

Angelo A. Davelaar,

Presidente di Bestür

Curaçao, 15 di yüli 2020